Ministria e Kulturës dhe Informacionit e Arabisë Saudite ka autorizuar kompaninë amerikane “American Multi-Cinema” (AMC) për hapjen e një kinemaje në këtë shtet, pas 35 vjetëve, njoftoi agjencia turke e lajmeve Anadolu Agency (AA).

“Kompania amerikane ka marrë lejen e punës për hapjen e kinemave në Arabinë Saudite, me kinemanë e parë që do të nisë punën më 18 prill”, konfirmoi agjencia saudite të lajmeve SPA.

Për arsye konservatore, autoritetet saudite mbyllën kinematë në vitet e ’80.

Ministri i Kulturës dhe Informacionit, Avad bin Salih al-Avad theksoi se ky vendim ka një rëndësi të madhe për investitorët të cilët do të përfshihen në këtë sektor.

“Arabia Saudite është një treg i madh. Banorët tanë kanë dëshirë të shohin këtu filmat me popullaritet të lartë” theksoi ai.

Avad nënvizoi se një prej qëllimeve kryesore të Arabisë Saudite për vitin 2030 është formimi i qendrave argëtuese me të cilat do të rritet edhe standardi i jetës.

“Rinisja e këtij sektori do t’i sjellë Arabisë Saudite vende të reja pune ndërkohë që do të kontribuojë edhe në rritjen e ekonomisë”, shtoi ai.

Në bazë të marrëveshjes, AMC do të duhet që në pesë vitet e ardhshme të hapë 30 kinema në 15 qytete saudite ndërsa plani është që deri në vitin 2030 projekti të shtrihet në 25 qytete.

Trashëgimtari i fronit, Muhammed bin Selman, në tetor të vitit 2017 deklaroi se Arabia Saudite do t’i rikthehet “islamit të moderuar”.